DDoS hücumlar reallaşdıran yeni güclü botnet aşkar edilib. Aşkar edilmiş botnet internet tarixinin ən güclü botnetidir. StormWall şirkətinin mütəxəssisləri qeyd ediblər ki, sözügedən botnetin hücumlarının maksimal gücü saniyədə 2 Tbit təşkil edir. Bu isə mövcud olan bütün botnet hücumları arasında rekord göstəricidir. Aşkar edilmiş yeni botnet 49.000 ədəd cihazdan ibarətdir. Bu cihazlar yalnız serverlərdən ibarətdir. Onların arasında kompüterlər və mobil cihazlar yoxdur. Bu botnet tərəfindən reallaşdırılan hücumlar standart xarakter daşıyırlar və əsasən oyun sektoruna yönəliblər. Aşkar edilmiş botnet UDP, TCP və HTTP protokolları üzrə hücumlar reallaşdırmağı bacarır.

Bu ayın əvvəlində Microsoft özünün Defender antivirusunun çalışma siyasətinə dəyişikliklər əlavə etmişdi. Bundan sonra arzuolunmaz tətbiqlərin bloklanmasını təmin edən alqoritm sistem tərəfindən şübhəli bilinən tətbiqlərin yüklənməsinin və işə salınmasının qarşısını alacaq. Bu cür tətbiqlər siyahısına torrent və kriptovalyuta mayninqi tətbiqləri də daxil olublar. Arzuolunmaz tətbiqlərin bloklanması funksiyası hələ 2018-ci ildə təqdim olunmuşdu. Lakin həmin vaxtda istifadəçi onu PowerShell sistem aləti vasitəsilə fərdi şəkildə aktivləşdirməli idi.

Whatsqapp-da View Once adlı yeni funksiya istifadəyə verilib. Bu funksiya vasitəsilə göndərilmiş foto və ya videoya yalnız bir dəfə baxmaq mümkündür. Bu üsul ilə göndərilmiş foto və ya videoya baxdıqdan sonra mesaj avtomatik olaraq silinir. Whatsapp təmsilçilərinin fikirlərinə əsasən bu funksiya bəzi konfidensial məlumatları göndərmək üçün yaxşı variantdır. Buna misal olaraq kağıza yazılmış hansısa şifrənin fotosunu gətirmək olar. Sözügedən funksiyadan istifadə etmək üçün mesajı göndərmə düyməsinin yanındakı 1 rəqəmi ilə əks olunmuş düyməyə klikləmək lazımdır. 

Beləliklə mesajı əldə etmiş şəxs mesajdakı foto və ya videoya baxdıqdan sonra həmin kontent avtomatik olaraq silinəcək.

Android Jelly Bean-in rəsmi dəstəyinin dayandırılmasından sonra Google şirkəti daha bir köhnə Android versiyası üçün olacaq məhdudlaşdırmanı elan edib. Bu dəfə söhbət, Android Gingerbread (Android 2.3) əməliyyat sistemindən gedir. Artıq yaxın zamanda bu əməliyyat sistemi vasitəsilə çalışan smartfonların istifadəçiləri Google servislərindən istifadə edə bilməyəcəklər. Bu ilin 27 sentyabr tarixindən Google şirkəti Android 2.3.7 və daha köhnə versiyalar vasitəsilə çalışan smartfonlarda öz servislərinə girişi bağlayacaq. Bu səbəbdən də istifadəçilər Gmail və Google Maps kimi servislərdən istifadə edə bilməyəcəklər.

Google şirkəti jurnalistlər üçün Pixel 6 və Pixel 6 Pro smartfonlarının qapalı təqdimatlarını keçirdib. Bu ilin payız fəslində rəsmi şəkildə təqdim olunacaq bu smartfonların dizaynlarından əlavə olaraq onların bəzi texniki özəllikləri də məlum olub. Beləliklə hər iki smartfon Google şirkətinin fərdi prosesorunu, təkmilləşdirilmiş kameraları və Pixel seriyasında ilk dəfə qeyri-adi dizaynı əldə edəcəklər. Təqdimat zamanı Google jurnalistlərə smartfonların fotolarını çəkməyi qadağan edib. Lakin buna baxmayaraq Google bu smartfonların render fotosunu təqdim edib. Həmin render foto smartfonların dizaynları ilə yaxından tanış olmağa şərait yaradır.