Tərtibatçılar üçün nəzərdə tutulmuş WWDC 2021 konfransı çərçivəsində Apple şirkəti iOS 15 əməliyyat sistemini təqdim edib. iOS-in yeni versiyasında Apple ilk öncə servislər ilə tətbiqlərə diqqət ayırıb. Əməliyyat sisteminin özündə isə istifadəçilərin gözlədikləri kimi o qədər də çox dəyişiklik yoxdur. Beləliklə şirkət iOS 15-də FaceTime tətbiqini ciddi şəkildə yeniləyib. Qrup videozəngləri zamanı danışan şəxs müvafiq animasiya ilə işarələnir və onun səsi smartfon ekranında əks olunduğu tərəfdən gəlir. Bundan əlavə olaraq tətbiqə ətraf səs-küyün boğulması və portret rejimi kimi funksiyalar əlavə olunub. Bundan sonra FaceTime üzərindən yaradılmış videokonfranslara linkləri istənilən rahat yol ilə göndərmək olar.

Kibertəhlükəsizlik sahəsində fəaliyyət göstərən Hector Martin adlı tədqiqatçı Apple şirkətinin M1 adlı prosessorunda sistem boşluğu aşkar edib. Qeyd etmək lazımdır ki, şirkətin son Mac kompüter modelləri məhz bu prosessor ilə təchiz olunurlar. Beləliklə kibertəhlükəsizlik üzrə mütəxəssis aşkar edib ki, prosessorun konstruksiyasında olan qüsur kompüterdə paralel olaraq iki tətbiqi işə salmağa və həmin tətbiqlər arasında məlumat mübadiləsi aparmağa imkan verir. Sistem idarəsi altında çalışan istənilən iki tətbiq yaddaşdan, fayllardan və əməliyyat sisteminin digər özəlliklərindən istifadə etmədən öz aralarında məlumat mübadiləsini reallaşdıra bilir.

Google şirkəti istifadəçilər üçün konfidensiallıq imkanlarının genişləndirilməsini anons edib. Belə ki, bundan sonra istifadəçilər Google servisləri daxilində reallaşdırmış olduqları əməliyyatlarının tarixçələrini xüsusi şifrə ilə qoruya və ya ümumilikdə həmin tarixçələrin yaddaşda saxlanılmasını deaktiv edə biləcəklər. Konfidensiallıq imkanlarını əhatə edən bu yeni funksiya Google şirkətinin saytlarında, servislərində, tətbiqlərində reallaşdırılmış əməliyyatların tarixçələrini, axtarış sorğularının tarixçələrini, Youtube platformasında baxış tarixçələrini və Google Assistant səsli köməkçisinə verilmiş sualların tarixçələrini əhatə edir.

Tayvanın TSMC şirkətinin təmsilçiləri elan ediblər ki, onlar uğurlu şəkildə 1 nanometrlik texnologiyanı yaradıblar. Perspektiv cəhətdən bu texnologiya prosessorların istehsalında istifadə olunacaq. Sözügedən texnologiya üzərində amerikalı və tayvanlı mütəxəssislər bir yerdə çalışırlar. TSMC şirkətinin Massaçusets Texnologiya İnstitutu, Berkli Kaliforniya Universiteti, Tayvan Milli Universiteti və digər təşkilatlar ilə əməkdaşlığı çərçivəsində xüsusi komponent aşkar edilib və həmin komponent 1 nanometrlik prosessorların istehsalında aparıcı rol oynayacaq.

Think 2021 adlı konfrans çərçivəsində IBM şirkəti süni zəka əsasında yaradılmış CodeNet adlı yeni alqoritmi təqdim edib. Yaradılmış bu yeni alqoritm tərcüməçi rolunda çıxış edərək proqramlaşdırma dilləri arasındakı uyğunsuzluq problemini aradan qaldırmaq üçün nəzərdə tutulub. CodeNet adlı qəliz generativ sistemin əsas özəlliyi ondadır ki, o, bir proqramlaşdırma dilindəki məlumatları digər proqramlaşdırma dilinə tərcümə edərək kodun ayrı-ayrı hissələrini və hətta bütöv layihələri yarada bilir. Məsələn proqramçı çox spesifik sahələrdə işlədilən bir neçə köhnə proqramlaşdırma dilini bilir.