NVIDIA şirkəti Stenford Universiteti ilə birgə əməkdaşlıq çərçivəsində EG3D adlı yeni neyron şəbəkəsi yaradıb. Sözügedən neyron şəbəkəsi ikiölçülü adi təsvirlər əsasında realistik üçölçülü təsvirlər yarada bilir. Məlumata əsasən yaradılmış bu alqoritm mövcud olan digər analoqları həm sürət həm də dəqiqlik baxımından geridə qoyur və bununla yanaşı öz işi üçün o qədər də güclü kompüter tələb etmir. EG3D adlı neyron şəbəkəsi adi insanların, məşhur şəxslərin və hətta heyvanların üzlərini detallı şəkildə yarada bilir. Onun generasiya etdiyi 3D obyektlər bütün perimetr üzrə düzgün həndəsi özəlliklərə sahibdirlər. Lakin alqoritm tərəfindən yaradılan 3D obyektləri oyunlarda və buna bənzər digər layihələrdə hələ istifadə etmək mümkün deyil.

    Samsung-un 3 nanometrlik prosessorları istehsal etməyə başladığı barəsində məlumat şirkətin rəsmi saytında qeyd edilib. Bundan əlavə olaraq Samsung 3 nanometrlik texnoloji prosesin üstünlüklərindən də danışıb. Ümumi olaraq söyləmək olar ki, 3 nanometrlik prosessorlar əvvəlki prosessorlar ilə müqayisədə daha kompakt ölçülü və daha güclü olacaqlar. Bununla yanaşı onlar daha az enerji sərfiyyatına sahib olacaqlar. Şirkətin sözlərinə əsasən 5 nanometrlik prosessorlardan fərqli olaraq yeni nəsil prosessorların sahələrinin 16% daha kiçik olmalarına baxmayaraq onların performansları 23%, enerji effektivlikləri isə 45% yüksələcək. Bu cür prosessorların istehsalında Gate-all-round (GAA) adlı tranzistor arxitekturasından istifadə ediləcək.

 Instagram öz istifadəçilərinin yaşlarını təyin edən yeni üsulları test edir. Onların arasında Yoti adlı şirkətin süni zəka alqoritmləri də var. Həmin alqoritmlər bu və ya digər fotoda əks olunmuş istifadəçinin üzünü skan edərək müəyəyn səviyyədə səhvlə onun yaşını təyin edə bilirlər. Məlumdur ki, Instagram öz platformasından 13 yaşdan aşağı uşaqların istifadə etməsini qadağan edir. Lakin fotoservis heç zaman bu faktorun nəzarətinə ciddi şəkildə yanaşmayıb.

MediaTek şirkəti flaqman smartfonlar üçün nəzərdə tutulmuş yeni Dimensity 9000+ prosessorunu təqdim edib. Sözügedən yeni prosessor Dimensity 9000 modelinin daha təkmilləşdirilmiş versiyasıdır. Təqdim edilmiş yeni Dimensity 9000+ prosessoru 5G dəstəkli flaqman smartfonlarda istifadə ediləcək. Qeyd etmək lazımdır ki, Dimensity 9000 modeli 8 nüvə ilə təchiz olunub: 3.05 GHz tezlikdə çalışan 1 ədəd Cortex-X2 nüvəsi, 2.85 GHz tezlikdə çalışan 3 ədəd Cortex-A710 nüvəsi və 1.8 GHz tezlikdə çalışan 4 ədəd Cortex-A510 nüvəsi.

Microsoft şirkəti Windows, macOS, iOS və Android əməliyyat sistemləri üçün Defender antivirus tətbiqinin istehlakçı versiyasını təqdim edib. Sözügedən antivirus tətbiqi özündə sadələşdirilmiş idarəetmə panelini birləşdirir və bütün istifadəçi cihazlarının kibertəhlükələrdən qorunmasını təmin edir. Beləliklə Defender-in istehlakçı versiyası Microsoft 365 Personal və Microsoft 365 Family abunəçiləri üçün aktivdir. İstifadə olunan cihazdan asılı olaraq antivirus tətbiqinin imkanları fərqlənir.