LG şirkəti 6G şəbəkəsinin imkanlarını tədqiq etməyə davam edir. Şirkət bu mövzuda növbəti uğurlu testini elan edib. Belə ki, şirkət 6G çərçivəsində rekord məsafədə məlumat ötürə və qəbul edə bilib. Söhbət, 500 metr məsafədən gedir. Bu isə şəhər mühiti çərçivəsində açıq havada aparılmış oxşar testlər zamanı qeyd edilmiş məsafələr arasında ən böyüyüdür.

Bu test həmçinin o cəhətdən vacibdir ki, o, 6G-nin müxtəlif şəbəkə ssenariləri çərçivəsində çalışma imkanını təsdiqləyir.

 Google şirkəti Google Podcasts servisini bağlayacağını elan edib. Bu, 2024-cü ildə baş verəcək. Şirkətin bu qərarı istifadəçilərin daha geniş şəkildə Youtube Music servisinə inteqrasiyaları çərçivəsində qəbul edilib. Bu ilin əvvəlində şirkət elan etmişdi ki, Youtube Music servisinə podkastların dəstəyi əlavə ediləcək. Avqust ayında isə Youtube Music-ə podkastlara sahib RSS kanalların yüklənmə mümkünlüyü anons edildi. Artıq aydın məsələdir ki, şirkət Google Podcasts ekosistemini birbaşa Youtube Music servisinə daşımaq niyyətindədir.

Microsoft şirkəti bir neçə gün bundan öncə Windows 11 üçün Windows 11 2023 Update yenilənməsini istifadəyə verdi. Sözügedən yenilənmə əməliyyat sistemi üçün bir sıra funksiyaları əlavə etməklə yanaşı Paint tətbiqinə maraqlı bir yeniliyi də gətirib. Söhbət, Cocreator adlı funksiyadan gedir. Bu, mətn formatında təsvirlər əsasında fotoların tərtib edilməsi üçün nəzərdə tutulmuş funksiyadır. Beləliklə bundan sonra istifadəçilər Paint-də süni zəka vasitəsilə fotolar tərtib edə biləcəklər. Cocreator funksiyasını işə salan xüsusi düymə Paint daxilində alətlər panelinə inteqrasiya edilib.

Microsoft şirkəti Surface brendi altında daha bir yeni noutbuk modelini təqdim edib. Söhbət, Surface Laptop Studio 2-dən gedir. Daha öncəki modeldən fərqli olaraq Surface Laptop Studio 2 daha performanslı texniki imkanları əldə edib. Beləliklə sözügedən yeni noutbuk 120 Hz-lik təsvir yenilənməsinə sahib 2400x1600 piksel keyfiyyətli 14.4 düym ekranla təchiz olunub. Ekranın maksimal parlaqlıq səviyyəsi 650 nit təşkil edir və Surface Slim Pen 2 stilusunu dəstəkləyir.

Microsoft şirkəti elan edib ki, o, Bing axtarış sisteminin süni zəka əsaslı çat-botuna yenicə istifadəyə verilmiş DALL-E 3 neyron şəbəkəsini inteqrasiya edəcək. Qeyd etmək lazımdır ki, DALL-E 3 mətn formatında təsvirlər əsasında fotoların tərtib edilməsi üçün nəzərdə tutulmuş DALL-E adlı neyron şəbəkəsinin yeni versiyasıdır. Yaxın zamanda ChatGPT çat-botunun ödənişli versiyası olan ChatGPT Plus-a inteqrasiya ediləcək DALL-E 3 sistemi istifadəçilərin sorğularını daha yaxşı anlayır və DALL-E 2-dən fərqli olaraq fotoları daha dəqiq və detallı şəkildə tərtib edə bilir.