Apple şirkəti 2025-ci ildə Apple Watch Ultra smart saatını micro-LED ekranla təchiz edəcək. Beləliklə şirkətin micro-LED ekranla təchiz olunacağı ilk məhsul məhz smart saat olacaq. İndi isə məlumat ortaya çıxıb ki, Apple micro-LED ekranlı Apple Watch Ultra ilə yanaşı həmçinin yeni Apple Pencil stilusu üzərində də çalışır. Söhbət, Apple Pencil 3-dən gedir. Məlumata əsasən Apple Pencil 3 stilusu Lightning girişi əvəzinə USB-C girişini əldə edəcək. Bununla yanaşı yeni stilus müxtəlif özəlliklərə sahib dəyişdirilə bilən başlıqlara sahib olacaq. Onları stilusa maqnit vasitəsilə bərkitmək mümkün olacaq. Apple Pencil 3-ün nə zaman təqdim olunacağı bilinmir. Ola bilər ki, Apple öz yeni stilusunu gələn il yenilənmiş iPad Pro ilə birgə təqdim etsin.

Microsoft OpenAI şirkətinin DALL-E 3 sistemini Bing Chat çat-botuna və Bing Image Creator servisinə inteqrasiya edib. Qeyd etmək lazımdır ki, DALL-E 3 mətn formatında təsvirlər əsasında fotoların tərtib edilməsini reallaşdıran neyron şəbəkəsidir. DALL-E 2-dən fərqli olaraq DALL-E 3 istifadəçi tərəfindən qeyd edilən sorğuları daha yaxşı başa düşür və fotoları daha detallı şəkildə tərtib edir. DALL-E 3-ün Bing Chat-a inteqrasiyası öz növbəsində istifadəçi sorğularını dəqiqləşdirməyə və tərtib olunmuş fotonu birbaşa çat-botla dialoq pəncərəsində redaktə etməyə imkan verir. Qeyd etmək lazımdır ki, OpenAI öz yeni neyron şəbəkəsinə əlavə təhlükəsizlik tədbirlərini əlavə edib. Məsələn istifadəçilər DALL-E 3 vasitəsilə məşhur şəxslərin fotolarını tərtib edə bilməzlər.

Çinin "Long March 2D" daşıyıcı aparatı "Yaogan-39" Yerin məsafədən zondlama peykini uğurla orbitə çıxarıb.

Raket Bakı vaxtı ilə saat 04:24-də Sıçuan əyalətindəki kosmodrom meydançasından buraxılıb.

“Long March 2D” ikimərhələli daşıyıcı aparatı Şanxay Kosmik Texnologiyalar Akademiyası tərəfindən peykləri aşağı Yer orbitinə çıxarmaq üçün hazırlanıb. Tərtibatçıların fikrincə, o, həmçinin təxminən 645 kilometr yüksəklikdə günəşlə sinxron orbitə 1300 kiloqrama qədər faydalı yük çıxarmağa qadirdir.

Apple şirkəti macOS Sonoma 14.1-in yeni versiyasını anons edib. Anons edilmiş versiya macOS Sonoma 14.1 Beta 2 adını əldə edib. Bu versiyadan tərtibatçılar və tərtibatçı hesabına sahib istifadəçilər artıq yararlana bilərlər. MacOS Sonoma 14.1 Beta 2-nin adi istifadəçilər üçün nəzərdə tutulmuş versiyası isə daha sonra istifadəyə veriləcək. Apple macOS Sonoma-nın bu versiyasında bəzi sistem səhvlərini aradan qaldırıb və Coverage bölməsini yeniləyib. Beləliklə sözügedən bölmə artıq iPhone və iPad-dəki Coverage bölməsini xatırladır.