Microsoft ən məşhur mobil tətbiqinin dəstəyini yaxın zamanda dayandıracaq

Microsoft ekosistemində sənədlərin skan edilməsi və rəqəmsallaşdırılması üçün nəzərdə tutulmuş ən məşhur pulsuz mobil alətlərdən biri olan Microsoft Lens tətbiqini mərhələli şəkildə deaktiv etməyə başlayacaq. Məlumata görə, xidmətin tam dayandırılması 2025-ci ilin dekabrına planlaşdırılıb. İstifadəçilərə oxşar funksiyaların mövcud olduğu Microsoft 365 Copilot-a keçmək təklif olunacaq. Microsoft Lens - Android və iOS platformaları üçün nəzərdə tutulmuş pulsuz tətbiqdir.O, ilk dəfə 2014-cü ildə Office Lens adı ilə istifadəyə verilib və 2021-ci ildə Microsoft Lens olaraq yenidən adlandırılıb.

Tətbiq sənədləri skan etməyə, əl yazısını tanımağa və rəqəmsallaşdırmağa, şəkilləri PDF, Word, Excel və PowerPoint formatlı fayllara çevirməyə, həmçinin materialları OneDrive və OneNote bulud xidmətlərində saxlamağa imkan verir.Hazırda tətbiqin Google Play-də 4.6 ulduz reytinqi və yalnız bu platformada 50 milyondan çox yüklənməsi var ki, bu da onu Microsoft-un ən çox tələbat görən mobil alətlərindən birinə çevirir.Mərhələli deaktivasiya sentyabr ayının ortasında başlayacaq. Oktyabrda Microsoft Lens yeni quraşdırmalar üçün əlçatan olmayacaq, noyabrda isə tətbiq mağazalarından tamamilə silinəcək. Dekabr ayında yeni skanlar yaratma funksiyası tamamilə deaktiv ediləcək, lakin əvvəllər saxlanılmış məlumatlar istifadəçilərin hesablarında qalacaq. Microsoft bu qərarını Lens-i süni intellekt əsaslı alətlər də daxil olmaqla digər imkanlarla birləşdirən vahid Microsoft 365 Copilot platformasına keçidlə izah edib.