Microsoft şirkəti bütün dünyadakı bölmələrində çalışan əməkdaşlarının 3%-ni ixtisar edəcəyini elan edib. Şirkət 25.8 milyard dollarla rekord səviyyədə rüblük mənfəət əldə etməsinə baxmayaraq, bu qərarı dinamik bazar şəraitinə uyğunlaşmaq və idarəetmə səviyyələrini azaltmaq zərurəti ilə əsaslandırıb. Bildirilir ki, bu, 2023-cü ilin əvvəlindən bəri baş verən ən böyük ixtisar dalğasıdır. Microsoft təsdiqləyib ki, ixtisarlar bütün səviyyələrdəki əməkdaşlara şamil olunacaq, lakin bu qərar onların fəaliyyət nəticələri ilə əlaqəli deyil. Windows Central portalı şirkət nümayəndələrinə istinadən qeyd edib ki, bu qərar bazarın sürətlə dəyişdiyi şəraitdə daha əlverişli mövqe tutmaq məqsədilə təşkilati dəyişikliklərlə bağlıdır.

Google şirkəti süni zəka əsaslı Gemini köməkçisini Google TV ilə çalışan cihazlara, Android Auto sistemli avtomobillərə, WearOS əməliyyat sistemi ilə çalışan ağıllı saatlara və Android XR ilə işləyən qarışıq reallıq cihazlarına gətirməyi planlaşdırır. Google dəqiq tarix göstərməsə də, Gemini-nin müxtəlif cihaz növlərində nə vaxt əlçatan olacağına dair ipucları verib. Google-un tərtibatçılar üçün bloqunda qeyd olunur ki, Google TV-də “uşaqlarınız üçün yaşa uyğun filmləri soruşa və ən yaxşı tövsiyələri ala bilərsiniz”. Nümunə olaraq istifadəçinin Gemini-dən ibtidai sinif şagirdinə Günəş sistemi haqqında danışmağını istədiyi bir vəziyyət təqdim olunur.

“Similarweb” şirkətinin tərtib etdiyi siyahıya əsasən “ChatGPT” dünyada ən çox ziyarət olunan saytlar arasında beşinci yeri tutub.

İstifadəçilərin “ChatGPT” saytında keçirdiyi orta vaxt 7 dəqiqə 15 saniyə təşkil edir. Bir ziyarət zamanı onlar adətən təxminən 4,15 səhifəyə baxış keçirirlər. Saytı yalnız bir səhifəyə baxdıqdan sonra tərk edənlərin faizi isə 29,59-dur.

Reytinqin ilk pilləsində “Google” axtarış sistemi qərarlaşıb. Burada istifadəçilər orta hesabla 10 dəqiqə 31 saniyə vaxt keçirirlər və bir ziyarət zamanı 8,91 səhifəyə baxırlar. “Google” saytını yalnız bir səhifəyə baxdıqdan sonra tərk edənlərin faizi isə 26,57-dir.

17-ci əsr kimyaçıları ucuz qurğuşunu qiymətli qızıla çevirməyi xəyal edirdilər. Lakin protonların sayındakı fərqə görə bu, kimyəvi baxımdan mümkün deyil. Buna baxmayaraq, CERN fizikləri Böyük Adron Kollayderi (BAK) vasitəsilə qurğuşun ionlarını toqquşduraraq transmutasiya həyata keçiriblər. Doğrudur, qurğuşun yalnız ani bir anlıq qızıla çevrilib və bu proses böyük enerji sərfi tələb edib. CERN alimləri kimyaçıların arzusunu reallaşdıraraq, işıq sürətinə yaxın sürətlə hərəkət edən qurğuşun ionlarından ibarət şüaları bir-birinə qarşı yönəldiblər.

Əsasən kimyəvi zavodlar və neft-qaz sənayesi müəssisələri tərəfindən atılan sənaye tullantı suları mürəkkəb çirkləndirici maddələrdən təşkil edilir. Təbii mikroorqanizmlər bu çirklənmələrlə mübarizə apara bilmir, lakin Çindən olan bioloqlar komandası bu sahədə irəliləyişə nail olublar. Onlar yüksək duzluluğa malik tullantı sularında 5 müxtəlif tip orqanik çirkləndiricini eyni vaxtda parçalaya bilən yeni bir bakteriya ştammı yaradıblar. Kimya və neft-qaz sənayesinə məxsus sənaye müəssisələrinin tullantı sularında adətən bərk asılı maddələr, orqanik birləşmələr, ağır metallar, toksik kimyəvi maddələr və qida duzları olur.