ChatGPT-nin yaradıcısı olan OpenAI şirkəti, onlayn axtarış sahəsində Google ilə rəqabəti davam etdirir. Buna baxmayaraq, şəbəkə mənbələrinin məlumatına görə, şirkət öz çat-botunu öyrətmək və dəstəkləmək üçün Google axtarış sisteminin məlumatlarından istifadə edir. Mövcud məlumata əsasən, OpenAI Texas ştatının Ostin şəhərində yerləşən veb-məlumatların parsinq xidməti SerpApi vasitəsilə Google axtarışından toplanan məlumatlardan yararlanır. Bu məlumatlardan ChatGPT onlayn rejimdə cavablar yaratmaq üçün istifadə edir, xüsusən də xəbərlər, idman və maliyyə bazarları kimi sahələrdə. Yəni OpenAI-nin öz alətlərinin rəqiblərdən geri qaldığı istiqamətlərdə.

Google hazırda Translate tətbiqi üzərində təcrübələr aparır və Gemini-ni ora inteqrasiya etməklə məşğuldur. Google Translate artıq uzun müddətdir ki, şirkətin əsas xidmətlərində - Search, Google Lens və Circle to Search-də istifadə olunur. Bu da onu mühüm proqram məhsuluna çevirir. Ona görə də Google-un onun inkişafı üzərində işləməsi təəccüblü deyil. Tətbiqin qarşıdakı yenilikləri arasında Duolingo üslubunda alət, daha axıcı söhbət rejimi və tərcümə dəqiqliyini artırmaq üçün tam süni intellekt yeniləməsi olacaq. Bu yeniləmələr artıq tətbiq edilməyə başlanılıb.

Apple, süni intellekt inteqrasiyası ilə ağıllı ev üçün bir sıra yeni məhsullar təqdim etməyi planlaşdırır. Bunlara masaüstü robot, ev sistemlərini idarə etmək üçün ağıllı ekran və səsli köməkçi Siri-nin animasiyalı versiyası daxildir. Bəzi cihazların yaxın vaxtlarda təqdim ediləcəyi gözlənilir. Bloomberg-in məşhur insayderi Mark Gurman-ın məlumatına görə, əsas yeniliklərdən biri iPad-ə bənzəyən robotlaşdırılmış qol formasında masaüstü köməkçi olacaq. Hərəkətli manipulyatora bərkidilmiş robot istifadəçi ilə qarşılıqlı əlaqə qura, suallara cavab verə və otaqda hərəkət edə biləcək.

Pekində Dünya Robot Texnologiyaları Konfransı (World Robot Conference, WRC) açılıb və burada onlarla Çin startapı humanoid (insanabənzər) robotlarını təqdim edib. Tədbir, belə qurğuların kütləvi satışları hələ geniş miqyasda başlamasa da, yerli robot texnologiyalarına investor marağının artdığı bir vaxtda keçirilib. Konfrans çərçivəsində, tədbirin keçirildiyi yerin yaxınlığında Robot Mall - təxminən 50 humanoid modelinin artıq satışda olduğu ticarət məkanı - da açılıb. Sərgidə müxtəlif hərəkətləri yerinə yetirə bilən robotlar təqdim olunub. Məsələn, rəqs etmək, qucaqlamaq və topu səbətə atmaq. Xüsusilə, Şençjendən olan LimX Dynamics startapı Alibaba Group Holding-in dəstəyi ilə ilk robotu Oli-ni təqdim edib. O, musiqi sədaları altında rəqs zamanı mürəkkəb hərəkətlər nümayiş etdirib.