Google Translate tərcümənin dəqiqliyini artırmaq üçün Gemini-dən istifadə edəcək

Google hazırda Translate tətbiqi üzərində təcrübələr aparır və Gemini-ni ora inteqrasiya etməklə məşğuldur. Google Translate artıq uzun müddətdir ki, şirkətin əsas xidmətlərində - Search, Google Lens və Circle to Search-də istifadə olunur. Bu da onu mühüm proqram məhsuluna çevirir. Ona görə də Google-un onun inkişafı üzərində işləməsi təəccüblü deyil. Tətbiqin qarşıdakı yenilikləri arasında Duolingo üslubunda alət, daha axıcı söhbət rejimi və tərcümə dəqiqliyini artırmaq üçün tam süni intellekt yeniləməsi olacaq. Bu yeniləmələr artıq tətbiq edilməyə başlanılıb.

Google Translate-in 9.15.114 versiyasının son təhlili isə gələcək funksional yeniliklər və interfeys təkmilləşdirmələri barədə məlumat verən kodu üzə çıxarıb. "Fast" rejimi gündəlik tapşırıqlar üçün əlverişlidir, "Advanced" rejim isə elmi tədqiqatlar kimi daha mürəkkəb mətnlərlə işləyərkən istifadə oluna bilər. Hazırda "Advanced" rejim yalnız ingilis-ispan və ingilis-fransız tərcümələrini dəstəkləyir. Gələcək yeniləmələrdə daha çox dil cütlüyünün dəstəklənəcəyi gözlənilir.