Google Photos servisində ödənişli funksiyaların ola biləcəkləri barəsində məlumat sızıntılarından sonra Google şikəti istifadəçilərin fotolarının bulud servisində saxlanması siyasətində dəyişiklik edib. Belə ki, yaxın gələcəkdə Android istifadəçiləri Google Photos servisindəki Gallery bölməsinin yaddaş həcminə nəzarət etməli olacaqlar. Əks halda onlar əlavə daxili yaddaş üçün ödəniş etməli olacaqlar. Google şirkətinin dəstək xidmətinin verdiyi məlumata əsasən 1 iyun 2021-ci il tarixindən başlayaraq bulud servislə sinxronlaşdırılan media kontentlər və Google servisləri vasitəsilə yaradılmış sənəd faylları Google Drive-da 15 GB-lıq limit çərçivəsində yerləşdiriləcəklər.

Heç gözlənilmədən Qualcomm şirkəti yeni Snapdragon X65 adlı 5G modemi təqdim edib. Bu, Snapdragon 888 prosessorlu cihazlara yenicə inteqrasiya edilən Snapdragon X60 5G modeminin davamçısıdır. Təqdim edilmiş yeni prosessorun əsas üstünlüyü isə mobil 5G şəbəkələrində məlumatın ötürülmə sürətinin yüksəlməsidir. Bu yeni modem 5G şəbəkələrində məlumatların saniyədə 10 Gbit sürətlə ötürülməsini təmin edir. Snapdragon X60-da isə bu göstərici saniyədə 7.6 Gbit-dir. Snapdragon X65 modemi Qualcomm 545 adlı 4-cü nəsil yeni mmWave anteni ilə təchiz olunub.

"Whatsap" messenceri video bölməsində yeni funksiyanı sınaqdan keçirir. Portalın məlumatına görə, videoçarxların redaktəsi zamanı xüsusi nişan əks olunacaq. İstifadəçi ondan istifadə etməklə hər hansı videoçarxı kəsilmiş səslə göndərə biləcək.

Funksiya hələ 2.21.3.13 beta versiyasında mövcuddur və sınaq mərhələsindədir. Portal eyni zamanda yeniləmə zamanı messengerə başqa stiker dəsti əlavə edəcəyini, eyni zamanda qrup söhbətində ad çəkmə funksiyasını da təkmilləşdirəcəyini qeyd edib.

Xiaomi Mi Mix Alpha-dan sonra yeni konseptual smartfonunu sərgiləyib. Bu üsul ilə şirkət gələcək smartfonların necə görünəcəyi ideyasını təqdim edib. Təqdim edilmiş yeni konseptual smartfon öz monolit dizaynı və gövdənin hər 4 tərəfinə əyilmiş ekranı ilə seçilir. Konseptual smartfonun əsas özəlliyi ekran konstruksiyasındadır. Belə ki, smartfonun ekranı gövdənin hər 4 tərəfində 88 dərəcə əyilib. Bununla belə smartfonun heç bir görünən çərçivəsi və ya əlavə paneli yoxdur. Mi Mix Alpha-dan fərqli olaraq bu yeni konseptual smartfonda ekran arxa paneli əhatə etmir. Arxa panel ənənəvi dizaynda reallaşdırılıb.

Çin regionunda yeni MIUI 12.5 istifadəçi interfeysinin qapalı beta testindən sonra Xiaomi şirkəti onun qlobal beta testini elan edib. Bundan əlavə olaraq şirkət yaxın zamanda yeni istifadəçi interfeysinin stabil versiyasını əldə edəcək smartfonların siyahısını da təqdim edib. Qeyd etmək lazımdır ki, MIUI 12.5 istifadəçi interfeysi dekabr ayında Mi 11 flaqman smartfonu ilə birlikdə təqdim olunmuşdu.