WhatsApp-da çatların eksportu və fotoların avtomatik yüklənməsinin qadağası funksiyası istifadəyə verilib

WhatsApp, istifadəçilərə söhbətlərində əlavə məxfilik səviyyəsi təmin edəcək yeni bir funksiyanın istifadəyə verildiyini elan edib. Advanced Chat Privacy adlanan bu yeni ayar, yazışmaların ixrac edilməsini və media fayllarının avtomatik olaraq cihazlara yüklənməsini həm sizin, həm də qarşı tərəfin cihazı üçün bloklayır. Əvvəllər WhatsApp-da mesajların yönləndirilməsinə qadağa qoymaq mümkün idi. Mesajlaşma artıq end-to-end şifrələmə ilə qorunur, lakin bu yeni funksiya məxfiliyi daha da gücləndirir. O, yalnız Meta AI ilə qarşılıqlı əlaqə imkanlarını məhdudlaşdırmaqla qalmır, həm də istifadəçilərə söhbətlərdə deyilən və göndərilən hər şeyin həmin çat çərçivəsində qalacağına dair əlavə güvən hissi verir.

 Qeyd etmək lazımdır ki, istifadəçilər hələ də ayrı-ayrı mesajların ekran görüntüsünü (screenshot) ala bilirlər. Lakin WhatsApp gələcəkdə Advanced Chat Privacy funksiyasını daha da genişləndirərək əlavə qoruma tədbirlərini tətbiq etməyi planlaşdırır - ola bilsin ki, növbəti versiyalardan birində ekran görüntülərinin yaradılmasına qadağa qoyulacaq. Şirkət vurğulayır ki, bu funksiya xüsusilə iştirakçıların bir-birilərinin şəxsən tanımadıqları, lakin həssas mövzuları müzakirə etdikləri hallarda faydalı ola bilər.