Google daha bir servisininin fəaliyyətini dayandıracaq

    Google şirkəti müxtəlif servislərinin bağlanması ilə məşhurdur. Hələ bir neçə müddət bundan öncə şirkət özünün Stadia adlı cloud gaming servisini inkişaf etdirməkdən imtina etdi və onun bağlanacağını açıqladı. İndi isə şirkətin daha bir servisinin bağlanacağı məlum olub. Söhbət, Street View-dan gedir. Sözügedən servis şəhər küçələrini panoram şəkildə izləmək üçün nəzərdə tutulub. 9to5google saytının əməkdaşları Street View servisinin bağlanacağını tətbiqin 2.0.0.484371618 nömrəli yeni versiyasının kodunun analizi nəticəsində öyrəniblər.

 Tətbiqin daxilinə yerləşdirilmiş mətnlərdən birində qeyd edilib ki, Street View servisi 21 mart 2023-cü il tarixində bağlanacaq. Alternativ olaraq Google kompüterlər üçün nəzərdə tutulmuş Street View Studio-nu yükləməyi məsləhət görür. Smartfonlar üçün olan Street View tətbiqi sayəsində istifadəçilər bütün dünyadan olan 360 dərəcəli foto və videoları əldə edə bilirlər. Bundan əlavə olaraq istifadəçilər sözügedən servisdə özlərinin çəkmiş olduqları 360 dərəcəli foto və videoları paylaşa bilirlər. Məlumatda qeyd edilib ki, Google Maps-də küçələrin izlənməsi özəlliyi olduğun kimi qalacaq.